کہانی

گلزار ایک خوابوں خیالوں میں رہنے والی لڑکی ہے جو ازمیر کے ایک غریب محلے میں اپنی ماں کی دوست سوزان کے ساتھ رہتی ہے ۔اسے اس زندگی سے سخت نفرت ہے ۔یہی وجہ ہے کہ اس نے ہمیشہ بڑے بڑے خواب دیکھنا سیکھا ہے۔جن کے پورا ہوتے ہی اسے اس غریب محلے سے ہمیشہ کیلئے چھٹکارا مل جائے گا۔ گلزار کو موسیقی سے عشق ہے اور آنے والے وقت میں وہ مشہور گلوکارہ بننا چاہتی ہے جس کے لیے وہ دن رات محنت کر رہی ہے۔ گلزار کی ماں کی دوست سوزان ایک مخلص اور اچھی عورت ہے جس نے اپنی دوست کی بیٹی کی پرورش ایک ماں کی طرح کی ہے۔ سوزان ایک سستے سے نائٹ کلب میں کام کرتی ہے جہاں کی ملکیت شریف کے پاس ہے۔ شریف ایک لالچی اور مطلبی عورت ہے جو اب گلزار پر نظر رکھتی ہے تاکہ اسے اپنے مقصد کیلئے استعمال کر سکے۔ وہیں کلب میں ایک بوڑھا عیاش آدمی گلزار سے شادی کرنا چاہتا ہے۔ دوسری طرف گلزار کی زندگی پل بھر میں بدل جاتی ہے ۔زندگی کا یہ نیا ڈرامائی موڑ سب کو حیران کر کے رکھ دیتا ہے جب گلزار کو پتہ چلتا ہے کہ وہ کسی امیر کبیر شخص کی بیٹی ہے۔وہ امیر آدمی بستر مرگ پر ہے اور مرنے سے پہلے وہ اپنی بیٹی گلزار سے ملنا چاہتا ہے اور چاہتا ہے کہ جتنے دن اس کی زندگی باقی ہے گلزار اس کے ساتھ رہے۔جس کو اس نے ہمیشہ اپنے پورے خاندان سے چھپا کر رکھا ہوتاہے۔ یہ حقیقت گلزار اور اس آدمی کے خاندان میں ایک قیامت کھڑ ی کر دیتی ہے۔ گلزار جب اپنے سوتیلے رشتوں کے پاس پہنچتی ہے تو وہ اپنے باپ کی مال ودولت دیکھ کر حیران رہ جاتی ہے۔گلزار کی آمد اس خاندان کے لیے سخت پریشانی کا باعث بنتی ہے۔گلزار کا باپ گلزار سے ملنے کے فوراً بعد فوت ہو جاتا ہے ۔ گلزار باپ کے مرنے کے بعد اسی محل میں رہ جاتی ہے۔ وہیں گھر کے ایک ملازم کے بیٹے مراد سے گلزار کا سامنا ہوتا ہے۔کچھ عرصے بعد گلزار مراد سے محبت میں مبتلا ہو جاتی ہے۔دوسری طرف گلزار کی سوتیلی بہن مینے بھی مراد سے پیار کرتی ہے اور شادی کرنا چاہتی ہے۔اب گلزار کی زندگی کا مقصد اپنا موسیقی کا کیرئیر بنانا اور مراد کو حاصل کرنا ہے۔ اپنے خوابوں اور محبت کو پانے کیلئے کیا حد سے گز جائے گی گلزار۔۔۔؟ سوتیلے رشتوں کی نفرت سے کیسے بچ پائے گی گلزار۔۔۔؟